كان قلبي لك مدينه

كان لك قلبي مدينة ولاحظ اني قلت كان
ماتغير شي لكن صار فاضي هالمكان
يعني انت شفت قلبي طحت من عيني وعينه
كان لك قلبي مدينه ولاحظ اني قلت كان
يعني انت الحين واحد خارج حدود المدينه
ليه مستغرب كلامي وليه اعطيك الامان
وليه تكذب في كلامك العذر وينك ووينه
ما ألومك كان قلبك ثارت امواجه وخان
الخطا مني لاني صرت في بحرك سفينه
والسؤال اللي كتمته ومانطق فيه اللسان
كيف ايدك اطعنتني وانا احسبها امينه..؟
جرحي مايرضيه قلبك لو يجي كله حنان
لو تبوس الجرح فيني ولو تقبلها يدينه
يوم احبك قلت كلمه: (يكرم المرء او يهان)
وانت قلبي ماكرمته وماقدرت انك تهينه
(عزتي).. ماهي جديده انا شامخ من زمان
اغسل ايدينك من رجوعي وروح يا إبن اللذينه
طاب خاطر قلبي منك وهذي الفرقى رهان
وحتى لو قلبي يحبك ربي بفراقك يعينه
تدري لما قلت احبك قلت وماعندي ضمان
واختياري كان خاطئ تجربه بالحيل شينه
كنت تخطي وكنت اسامح مره مرتين وثمان
امسح الزله عشانك واكتم انفاس الغبينه
كنت احبك وكنت اعزك والغلا فيني جبان
خاف تزعل لو الومك ضعت مابينك وبينه
في عيون الناس عادي بس في عيني جنان
وكان قلبي من يشوفك تفضحه نظرة حنينه
ماني اول من يحب ومنت اخر شخص خان
المحبه في زمانك بحرها من غير مينه
الفشل .. كان النتيجه واعتقد ان الاوان
ابني مستقبل حياتي وانسى قصتنا الحزينه
وخطوتي الاولى غيابك وراح اطبقها عشان
يبكي قلبك لافقدني والندم.. يملي سنينه
جاي تسأل عن مكانك .. هو بقى فيني مكان؟
الله يرحمها المشاعر اللي كانت لك رهينه
قلت لك قلبي (مدينه) فيها لك حشمه وشان
لكن انت الحين اغرب شخص في هذي المدينه ؟؟